როგორ მოვამზადოთ უგემრიელესი ყავა

ალბათ, არც თუ ისე დიდი ხნის წინ, სამუშაო დღე, ბევრი თქვენგანისთვის, იწყებოდა ყავით ხელში. ყავის მოხმარების სტატისტიკას თუ დავაკვირდებით, აღმოვაჩენთ რომ გასულ თვეში ამ ნიშნულმა დიდი ნახტომი გააკეთა რაც გამოიხატა 5 პროცენტიან ზრდაში ბოლო 5 წელიწადთან შედარებით. უფრო კარგად რომ აგიხსნათ, ეს იმას გულისხმობს რომ მთლიანი მარცვლისა და დაფქული ყავის გაყიდვები შუა მარტში 61 პროცენტით უფრო მაღალი იყო, ვიდრე წინა წელს იგივე დროს – აცხადებს მონაცემთა ანალიტიკის კომპანია IRI.

თუ საკუთარი ხელით ყავის მომზადებას არ ხართ ჩვეული, შესაძლოა არც იცოდეთ, როგორ შეიძლება სახლში კომპლექსური და არომატული ყავის მიღება. ან თუ ცოტაოდენი თავისუფალი დრო გამოგიჩნდათ, სტანდარტულად ყავის აპარატით მომზადების ნაცვლად, იქნებ გსურთ ცოტათი იექსპერიმენტოთ და ხარშვის განსხვავებული მეთოდი მოსინჯოთ.

გვინდა გითხრათ, რომ შესანიშნავი ყავის მომზადება სახლის პირობებში, იმაზე მარტივია, ვიდრე ფიქრობთ. ჩვენ მოვიწვიეთ ყავის ორი ექსპერტ გამომცდელი, რომლებიც ხუთი სხვადასხვა ტექნიკის გამოყენებით: Aeropress, Chemex, French press, pour-over და auto drip ნაბიჯ-ნაბიჯ გასწავლიან თუ როგორ მზადდება იდეალური ფინჯანი ყავა. მნიშვნელობა არ აქვს თუ რომელს აარჩევთ, აღნიშნული რჩევები თქვენ ნამდვილ ბარისტად გაქცევთ.

ასე რომ, მოიმარაგეთ თქვენი იარაღები

როგორც კარგი შეფ-მზარეული ვერას გახდება ხარისხიანი ინგრედიენტებისა და აღჭურვილობის გარეშე, ანალოგიურად, ბარისტაც მაშინაა კარგი, როცა მას ხელთ საუკეთესო ხარისხის ყავის მარცვლები და შესაბამისი იარაღები აქვს. დამშვიდდით, გაჯეტებისა და ინგრედიენტებში ინვესტიცია მთელ თქვენ დანაზოგად ნამდვილად არ დაგიჯდებათ, მაგრამ თუ ცოტათი გულუხვობას გამოიჩენთ, სახლში მოწყობილი ნამდვილი „Coffee-Shop” დაგრჩებათ.

  • შეიძინეთ ხარისხიანი, ახალი მარცვლები. ყავის მარტვლები მოხალვისა და დაფქვის შემდეგ სწრაფად კარგავს სურნელსა და არომატს. დაფქული ყავის გემოსა და სიახლის გასაუმჯობესებლად, ისეთი მთლიანი მარცვლები შეარჩიეთ, რომელსაც აწერია მოხალვის თარიღი – იდეალურ შემთხვევაში ეს რამდენიმე დღე უნდა იყოს. (ყველა ყავას არ აქვს მოხალვის თარიღი დაბეჭდილი მათ შეფუთვაზე, თუმცა თუ ასეთს შეხვდებით, ეს უდავოდ მათი ხარისხის მანიშნებელია.) ნუ დაფქვავთ მარცვლებს თუ ყავის მოდუღებას ჯერ არ აპირებთ.
  • ინვესტიცია ჩადეთ “burr” საფქვავში. გემრიელი და დაბალანსებული გემოს მისაღებად მნიშვნელობა აქვს დაფქული ყავის ზომასა და ფორმასაც.
  • ყურადღება მიაქციეთ წყლის ტემპერატურას. ხარშვის ოპტიმალური ტემპერატურა ექსტრაქტის მაქსიმალური გაჯერებისათვის 90-დან 96 გრადუს ცელსიუსამდეა. გამოიყენეთ გაფილტრული წყალი, რადგან ონკანის წყალში არსებული მინარევებმა შესაძლოა სურნელება საერთოდაც გაუქროს ყავას.
  • აწონეთ ყავაც და წყალიც. პატარა სასწორი ყავისა და წყლის ზუსტი ოდენობის განსაზღვრაში დაგეხმარებათ და დარწმუნდებით რომ მართლაც სრულყოფილი თანაფარდობით ამზადებთ.
  • დაინიშნეთ დრო. სამზარეულოს ტაიმერით (ან სმარტფონის) დროს თუ აკონტროლებთ, დარწმუნდებით რომ არც დუღილს დააკლებთ და არც ზედმეტად გადაადუღებთ თქვენს ყავას.

აირჩიეთ ხარშვის თქვენი მეთოდი

არ არსებობს ყავის მომზადების მხოლოდ ერთი სწორი მეთოდი. ფაქტობრივად, თქვენ აქ მოცემული მეთოდებიდან ბევრის მოსინჯვა მოგიწევთ, სანამ თქვენს ფავორიტს აარჩევდეთ. მაგრამ იმ შემთხვევაში, თუ თქვენ ქვემოთ მოცემულ ნაბიჯებს მიყვებით, რომლებიც კოლუმბიური ყავის ჩვენმა ექსპერტ ტექნოლოგებმა ჩამოაყალიბეს – თქვენ ყოველ ჯერზე ხელთ გემრიელი, სურნელოვანი და ხარისხიანი ფინჯანი ყავა აღმოგაჩნდებათ. გაითვალისწინეთ ისიც, რომ თითოეული მეთოდით განსხვავებული გემოს ყავის მიღებაა შესაძლებელი.

Aeropress

გემოს ნოტები: საკმაოდ კომპლექსური ყავა კარგი კონსისტენციითა და არომატით.

დადებითი და უარყოფითი მხარეები: სრულყოფილია მაშინ როცა სწრაფი, ერთი ულუფის მომზადება გსურთ და ამის სანაცვლოდ არც არომატს თმობთ. მოხმარება და მისი გასუფთავება მარტივია, გთავაზობთ ისეთ ყავას რომელიც “drip“-ზე უფრო კომპლექსურია მაგრამ ქვემოთ ჩამოთვლილ მეთოდებზე ერთი ნაბიჯით უკანაა.

  1. სუფთად დაფქვით ყავა.
  2. შეასველეთ რეზინის დგუში და მოათავსეთ ის მოსადუღებელ ცილინდრში, დაახლოებით ¼ ინჩ სიღრმეზე. ამოატრიალეთ ცილინდრი თავდაყირა და მოათავსეთ სასწორზე. გაანულეთ სასწორი.
  3. ცილინდრში დაამატეთ 17 გრამი ყავა. გაანულეთ სასწორი.
  4. ფრთხილად დაამატეთ 250 გრამი ცხელი გაფილტრული წყალი (96 გრადუსი ცელსიუსით).
  5. დააყენეთ 1 წუთისა და 15 წამის განმავლობაში.
  6. მოათავსეთ ქაღალდის ფილტრი ფილტრის დამჭერში, ცხელი წყლით დაატენიანეთ ფილტრი და დაამაგრეთ დამჭერით.
  7. ისევ ამოატრიალეთ ცილინდრი და დადგით ფინჯანზე. წყლის ბოლომდე დაცლამდე თანაბარი წნევით მსუბუქად დააწექით ცილინდრს ქვემოთა მიმართულებით.

Chemex


გემოს ნოტები: კომპლექსური, არომატული და დაბალანსებული გემო ტკბილი და პიკანტური ნახევარტონებით.

დადებითი და უარყოფითი მხარეები: სქელი Chemex-ის ბრენდის ფილტრები არეგულირებენ ფილტრაციის სიჩქარესა და აშორებენ ზედმეტ ნალექს. ცილინდრში იოლად შეგიძლიათ მორევა, მაგრამ ვიწრო ყელის გამო მისი ხელით გასუფთავება ცოტათი გაგიჭირდებათ. ხის სახელური ჭურჭლის სარეცხი მანქანის გამოყენებით ვერ გაირეცხება, მაგრამ ის ასევე იოლადაც ცილდება.

  1. ყავის მარცვლები საშუალო ზომაზე დაქვით.
  2. მოათავსეთ ქაღალდის ფილტრი ჭურჭელში და დაანოტივეთ ცხელი წყლით. გადაასხით ზედმეტი წყალი.
  3. განათავსეთ Chemex სასწორზე. გაანულეთ სასწორი.
  4. მოათავსეთ 32 გრამი დაფქული ყავა ფილტრში. გაანულეთ სასწორი.
  5. დაფქულ მარცვლებს წრიული მოძრაობით დაასხით 60-დან 70 გრამამდე ცხელი გაფილტრული წყალი (96 გრადუსი ცელსიუსი).
  6. ნელა, წრიული მოძრაობით დაასხით წყლის დარჩენილი ნაწილი დაფქულ მარცვლებს, სანამ სასწორი ჯამში 500 გრამს არ აჩვენებს.

გაითვალისწინეთ: წყალი უნდა წვეთავდეს 3 წუთნახევრიდან 4 წუთსა და 15 წამამდე. თუ აპარატს მეტი დრო სჭირდება, უფრო უხეშად დაფქვით, თუ ნაკლები – უფრო მსუბუქად.

French Press 

გემოს ნოტები: სურნელოვანი და მსუყე.
დადებითი და უარყოფითი მხარეები: ქაღალდის ფილტრის გარეშე, ეს ყავა შეიცავს საკუთარ ბუნებრივ ზეთებს, რაც უფრო გაჯერებულ გემოში გამოიხატება. დაწნული ფილტრი უმრავლესობა ნაფქვავს არ ატარებს, თუმცა მცირე, ფქვილის მსგავსი ყავის ნაწილაკები კვლავ რჩება ცილინდრში, რაც რაღაც მხრივ ბლანტ კონსისტენციას წარმოქმნის.

  1. უხეშად დაქვით ყავის მარცვლები.
  2. მოათავსეთ ცილინდრი სასწორზე. გაანულეთ სასწორი.
  3. მოათავსეთ 35 გრამი ყავა ცილინდრში. გაანულეთ სასწორი.
  4. დაუმატეთ 250 გრამი ცხელი გაფილტრული წყალი (96 გრადუსი ცელსიუსი).
  5. დაამატეთ წყალი რომ ეს ნარევი ჯამში 500 გრამს გაუტოლდეს.
  6. დააყენეთ ტაიმერი 4 წუთზე. 2 წუთზე მოურიეთ.
  7. 4 წუთზე, ნელა დააწექით დგუშს და ჩამოასხით ფინჯანში.

Pour-Over

გემოს ნოტები: სრული, პიკანტური და ტკბილი არომატი, არც ზედმეტად აქტიური, რბილი შეგრძნებით.

დადებითი და უარყოფითი მხარეები: ამ ტიპის მადუღარა მარტივი გასაწმენდია და არც დიდ ადგილს იჭერს თქვენს განჯინაში. თქვენ ასევე შეგიძლიათ ყავის პირდაპირ თქვენს ჭიქაში მომზადება, რაც გასარეცხი ჭურჭლის ოდენობას შეგიმცირებთ.

  1. საშუალო ზომაზე დაფქვით ყავის მარცვლები.
  2. მოათავსეთ მადუღარას რეზერვუარი ფინჯანზე ან ცილინდრზე და დაამაგრეთ ფილტრი; დაატენიანეთ ფილტრი ცხელი წყლით, გადაღვარეთ ზედმეტი წყალი.
  3. მოათავსეთ ფინჯანი და მადუღარას რეზერვუარი სასწორზე. გაანულეთ სასწორი.
  4. ფილტრში დაამატეთ 32 გრამი დაფქული ყავა. გაანულეთ სასწორი.
  5. ყავას წრიული მოძრაობით დაასხით 64 გრამი ცხელი გაფილტრული წყალი (96 გრადუსი ცელსიუსი).
  6. დაფქულ ყავას დარჩენილი წყალი ნელი მოძრაობით დაუმატეთ იქამდე სანამ მიქსტურა 500 გრამს არ მიაღწევს ჯამში.

გაითვალისწინეთ: წყალი უნდა წვეთავდეს 3 წუთნახევრიდან 4 წუთსა და 15 წამამდე. თუ უფრო დიდხანს უნდება, ყავა უფრო უხეშად უნდა დაფქვათ; თუ ნაკლები დრო სჭირდება -უფრო  მსუბუქად.

Auto-Drip 

გემოს ნოტები: თუ ყავის მომზადებას ნაკლები სკურპულოზურობით მიუდგებით, ყავის გემოც და კომპლექსურობაც პროპორციულად შეიცვლება და შემცირდება. მაგრამ, თუ მოსახერხებლობა უფრო მნიშვნელოვანია თქვენთვის, ვიდრე სრულყოფილება, auto-drip მაშინ კარგი არჩევანია.დადებითი და უარყოფითი მხარეები: Auto-drip მწარმოებლები პოპულარული იმის გამო არიან, რომ ამ მოწყობილობის გამოყენება და გაწმენდა არის მარტივი და ყავასაც ძალიან სწრაფად ადუღებს. მაგრამ ჩვენმა ექსპერტ გამომცდელებმა ასევე აღნიშნეს რომ ყავას პიკანტური გემო აქვს და შედარებით უფრო ტკბლი ნოტები მკვეთრი სიმჟავითაა შენიღბული.

1. დაფქვით ყავის მარცვლები საშუალო ზომაზე.
2. თუკი იყენებთ ქაღალდის ფილტრს, მოათავსეთ ის შესაბამის ადგილას და დაანოტივეთ ცხელი წყლით. ცილინდრს გამოავლეთ წყალი და გადაასხით.

3. 4.5 ფინჯანი ყავის მოსამზადებლად ჩაყარეთ დაახლოებით 6 კოვზი ყავა ფილტრში. ჩაასხით 3 ფინჯანი ცივი გაფილტრული წყალი რეზერვუარში. დააწექით ჩართვის ღილაკს.